انفلونزا الخنازير - خطر رهيب يجتاح العالم

السلام عليكم و رحمة الله و بركاتة اعضاء المنتدي الكرام

ان شاء الله هو موضوع مفيد جدا
نبدا بسم الله
انفلونزا الخنازير - خطر رهيب يجتاح العالم
الاسم العلمى: انفلونزا (أ) إتش 1 إن 1
منظمة الصحة العالمية اعلنت تحول انفلونزا الخنازير الى جائحة (وباء عالمى) و رفعت الإنذار الى الدرجة السادسة والقصوى
المحتويات

- تاريخ الوباء
- يا ترى إيه اللى سبب وباء الانفلونزا الأسبانية
- طريقة العدوى
- مأساة 2009
- جدول وخريطة الدول اللى ظهر فيها الإصابة وعدد الحالات
- إزاى أعرف إنى أصبت بأنفلونزا الخنازير؟
- إحنا فى إيدينا إيه نعمله عشان نقضى على الوباء ده؟
- هل ممكن أتعالج؟
- المصل ..
تاريخ الوباء:

البداية كانت سنة 1918م .. يعنى من أكتر من 90 سنة
فى الفترة دى كان العالم بدأ يلتقط أنفاسه من آثار الحرب العالمية الأولى
لكن للأسف لم تتاح له الفرصة
حيث اجتاح العالم وباء شديد
حصد ما بين 70 - 100 مليون شخص
تقريباً ضعف عدد اللى ماتوا فى الحرب العالمية الأولى
وكان سبب الوباء ده فيروس مرعب ..
هو فيروس الانفلونزا الأسبانية
وده هنسميه الأب الروحى لفيروس انفلونزا الخنازير
لأن الاتنين من طائفة واحدة هى انفلونزا (أ) إتش 1 إن 1

فيديو توضيحي

يا ترى إيه اللى سبب وباء الانفلونزا الأسبانية
عشان نتجنبه ومش يحصل تانى؟

هقول لكم ..

الفايروس ده ظهر فى البداية زى فيروس الانفلونزا الموسمية اللى بييجى لنا كلنا
وكانت أعراضه بسيطة جداً
ومش كان حد بيعطيه أى اهتمام
وفجأة اتحول من قطة وديعة إلى ذئب شرس
قتل الملايين من الناس
وترك وراءه مأساة لتحكيها الأجيال

طاب إيه سبب التحول ده ؟؟؟؟
هقول لكم .. بس بعد ما أخلص كلامى
يا ريت محدش يقاطعنى !!!!!!!!

أكيد كتير منكم هيقول ده حصل وقتها بسبب التخلف الطبى
وبسبب الحرب العالمية الأولى

هقول لهم كلامكم صح بخصوص النقطة التانية
وهى إن الحرب ساهمت بشكل كبير فى نقل العدوى
بسبب الزحام الشديد فى الثكنات الحربية
وده ممكن يفسر لنا إصابات انفلونزا الخنازير اللى ظهرت فى اسرائيل مؤخراً

لكن بخصوص النقطة الأولى واللى هى التخلف الطبى
إحنا دلوقتى نعتبر متقدمين طبياً
لكن للأسف مش هنقدر نقف أمام إعصار زى ده

ليه؟؟؟؟؟؟؟؟
بسبب النقطة اللى كنتم سألتم عنها من شوية
اللى هى ..
إيه سبب تحول فايروس الانفلونزا الأسبانية من القطة الوديعة إلى الذئب الشرس؟

الإجابة إن الفايروسات بتتميز بقابليتها الرهيبة لتغيير تركيبها
فأى أجسام مضادة بيصنعها جسمنا لمقاومتها
بتلاقى تركيبات جديدة ..
فيها إختلاف جزئى عن اللى هى متعودة عليه
وبالتالى مش بتقدر تقوم بدورها بالكامل فى القضاء عليها
وده اللى بيحصل فى الانفلونزا الموسمية ,
عشان كده المؤسسات الصحية بتنتج تركيبات جديدة من المصل كل سنة
لكن الأخطر من كده
إن الفايروسات ممكن تركيبها يتحورتحوربسيط مرة بعد مرة بعد مرة
لغاية ما توصل لمرحلة ..
تركيبها يتحوربشكل كبير
يقدر يتغلب على أى جسم مضاد
سواء مصدره داخل الجسم أو خارج الجسم
والتحور ده هو سبب تحويله إلى الذئب الشرس
عشان كده لو مش اتعاملنا مع خطر انفلونزا الخنازير بقوة وحزم
ممكن نصحى فى أى وقت
لنفاجأ بملايين الوفيات بسبب هذا الوباء
طريقة العدوى:
أكيد كلنا عارفينها
لأنها مشابهة لطريقة العدوى الخاصة بانفلونزا الطيور
وهى إن العدوى بتنتقل إلى الإنسان عند الاتصال بالخنازير المصابة
وممكن تتنقل من إنسان إلى خنزير ..

أو من إنسان لآخر

وده اللى خلى منظمة الصحة العالمية تطلق ناقوس الخطر
وتستعد لمواجهة وباء عالمى جديد
ودى مش أول مرة يظهر فيها فايروس الانفلونزا المشترك بين الناس والخنازير
لكن كان فى حالات ظهرت سنة 1974 وسنة 1988
وأخيراً 2009
لكن اشمعنى 2009 بالذات؟؟؟؟؟؟

بيعتقد العلماء إننا (بنى البشر) عدينا أحد الخنازير العجوزة بفايروس ..
وبعض الطيور المصابة بانفلونزا الطيور (وباء 2008) عدت نفس الخنزير بفايروس ..
والفايروسين تبادلوا جيناتهم
لينتجوا سلالة جديدة تصيب الإنسان وتقوم بقتله
مأساة 2009 :

بدأت فى المكسيك
تحديداً فى شهر فبراير
مجموعة من الأشخاص أصيبوا بمرض تنفسى حاد غير معروف
وكانت أول حالة اتأكدنا من إصابتها بالفايروس ده
طفل لم يتجاوز الرابعة من عمره
اسمه إدجار هيرناندز

وحتى يومنا هذا ..
تم الاشتباه فى آلاف الحالات
وظهر الفايروس فى أكتر من 76 دولة
وتم تأكيد إصابة أكتر من 35 ألف شخص بانفلونزا الخنازير
وتم إغلاق آلاف المدارس فى الولايات المتحدة والمكسيك واليابان
بسبب التأكد من ظهور حالات أو الاشتباه فيها
والحكومة البريطانية جهزت 350 مليون قناع للعاملين بالشئون الصحية
وقررت الحكومة المصرية إعدام نحو 160 ألف خنزير

جدول وخريطة الدول اللى ظهر فيها الإصابة وعدد الحالات
15 يونيو 2009
الإجمالى: 35,928 إصابة مؤكدة , و 163 حالة وفاة , فى 76 دولة
الدولة عدد الحالات
الولايات المتحدة 17,855 (45 حالة وفاة)
المكسيك 6,241 (108 حالة وفاة)
كندا 2,978 (4 حالات وفاة)
استراليا 1,823
شيلى 1,694 (حالتين وفاة)
المملكة المتحدة 1,226
اليابان 605
أسبانيا 488
الأرجنتين 343
الصين 318
بنما 272
ألمانيا 170
جواتيمالا 119 (حالة وفاة واحدة)
اسرائيل 117
كوستاريكا 104 (حالة وفاة واحدة)
السلفادور 95
جمهورية الدومينيكان 93 (حالة وفاة واحدة)
بيرو 91
هوندراوس 89
نيوزلندا 86
فرنسا 80
الإكوادور 80
الفلبين 77
إيطاليا 67
كوريا 65
هولندا 61
نيكراجوا 56
البرازيل 54
سنغافورة 47
أورجواى 36
كولومبيا 42 (حالة وفاة واحدة)
السويد 32
تايلاند 29
برجواى 25
فنزويلا 25
فيتنام 25
سويسرا 22
الكويت 18
مصر 18
بيلجيوم 17
الهند 16
نورواى 13
رومانيا 13
أيرلندا 12
اليونان 12
الدينمارك 12
السعودية 11
جامايكا 11
تركيا 10
لبنان 8
استريا 7
بولندا 7
بوليفيا 7
كوبا 6
ماليزيا 5
ترينيداد وتوباغو 5
فنلاند 4
المجر 4
إستونيا 4
جمهورية زيش 4
أيسلندا 4
روسيا 3
سلوفاكيا 3
بربادوس 3
البرتغال 3
بلغاريا 2
جزر كايمان 2
الضفة الغربية وغزة 2
الإمارات 1
البحرين 1
المغرب 1
باهاماز 1
قبرص 1
نيكراجوا 1
سيبراس 1
دومينيكانا 1
لكسومبورج 1
أوكرانيا 1

خريطة توضيحية لأماكن ظهور الوباء وعدد الحالات المؤكدة
بتاريخ 12 يونيو 2009


خريطة تفصيلية لأماكن ظهور الوباء وعدد الحالات المؤكدة والوفيات
بتاريخ 27 مايو 2009


لكن هل يا ترى إغلاق المدارس ولبس الأقنعة وإعدام الخنازير كافى للقضاء على الوباء؟
الإجابة بالتأكيد لأ
مش بقول كده عشان أصيبكم باليأس
لكن لازم نعرف حجم الخطر عشان نقدر نواجهه

إغلاق المدارس ممكن يمنع الوباء فى المدرسة
لكن مش له أى دخل بمنع الوباء خارجها

ولبس الأقنعة لازم يكون بطريقة محكمة ومستمرة
وإلا مش هيبقى له أى فايدة
واعتقد إن مستحيل إن حد مننا يلبس قناع فى الشارع

وإعدام الخنازير على الرغم صعوبته
إلا إنه هيحد من خطر انتشار الوباء بشكل كبير
لكن برده مش هيقضى عليه
لأنه بينتقل من شخص لشخص أيضاً
نيجى بقى لأهم نقطة
إزاى أعرف إنى أصبت بأنفلونزا الخنازير؟
عشان أتوجه بسرعة لأقرب مستشفى أو وحدة صحية أو عيادة

أعراض إنفلونزا الخنازير زى الأعراض الناتجة عن الإنفلونزا الموسمية المعروفة.
واللى بتشمل حمى وكحة و التهاب في الحلق و آلام في الجسم وصداع و رعشات وإرهاق و فقدان الشهية.
وبعض الناس بيصابوا بالإسهال والقيء.

يا جماعة بلاش نظرة الخوف اللى فى عينيكم دى
إحنا فى خطر ولازم نواجهه بكل شجاعة

لو ظهرت عندك الأعراض دى وانت فى مكان موجود فيه الوباء أو كنت مسافر لأحد أماكن الوباء زى المكسيك
لازم تستشير الطبيب فوراً
واسمح لى أصحح لك خطأ كبير كنت هتقع فيه
وهو إنك تروح المستشفى أو الوحدة الصحية أو العيادة
وده ممكن يسبب خطر كبير على كل المرضى
الحل المناسب إنك تستدعى الطبيب للكشف عليك فى المنزل
أكيد كلكم بتسألوا نفسكم الوقتى
إحنا فى إيدينا إيه نعمله عشان نقضى على الوباء ده؟

لما تكح أو تعطس .. لازم تبقى بعيد عن الناس .. وتستخدم منديل ورقى لتغطية أنفك وفمك .. وترميه بعدها على طول
واغسل إيدك قبل الأكل وبعده وقبل التعامل مع الحيوانات وبعده
وتجنب الاقتراب من مزارع الخنازير
وتجنب الاقتراب مع المرضى خصوصاً اللى عندهم حمى وكحة
وإذا كنت مضطر للتعامل معاهم .. لازم تلبس قناع .. ولازم تسأل الدكتور عن طريقة استخدامه
وإذا ظهرت لك أى أعراض برد أو انفلونزا .. حاول بقدر الإمكان مش تخرج من البيت
طاب يا ترى لو أصبت بانفلونزا الخنازير (بعد الشر يعنى) ..
هل ممكن أتعالج؟
الإجابة .. آه .. الحمد لله
السلطات الأمريكية بترشح علاجين ممكن نستخدمهم:
تاميفلو Tamiflu و ريلينز Relenza
والسلطات الإنجليزية بدأت تجهز مخزون ليها من التاميفلو Tamiflu

بس للأسف مش ليهم تأثير غير لو أخدناهم فى المراحل الأولى من الإصابة بس

لكن يا جماعة الأدوية دى لازم تؤخذ بإرشاد الطبيب
النقطة دى مهمة جداً جداً جداً
خاصة دلوقتى
لأن لو كلنا أخدناها للوقاية
ممكن يحصل تحورغير متوقع
وتظهر لنا سلالة جديدة مش نعرف لها أى علاج
وممكن تكون أكثر خطورة من اللى موجودة الوقتى
وطالما سألتم عن العلاج
هكلمكم عن حاجة مهمة .. وهى
المصل ..
عشان لو حد سألكم

للأسف .. الاحتمال الغالب إن مصل الانفلونزا الموجود الوقتى
مش له أى دور فى حمايتنا من انفلونزا الخنازير
والمصل اللى استخدمه العلماء فى الولايات المتحدة للوقاية من الوباء اللى حصل سنة 1976
كان له أعراض جانبية خطيرة
وسبب حالات وفاة أكتر من اللى سببها الفايروس نفسه
وجارى العمل دلوقتى على مصل جديد
لكن للأسف الأمر ده ممكن يستغرق حوالى 5 شهور
المكسيك والولايات المتحدة
ولو تابعنا تطور المأساة فى اليومين اللى فاتوا
هنلاحظ حاجة غريبة
إن الفايروس قتل أشخاص كتير فى المكسيك
لكن سبب إصابات متوسطة فى الولايات المتحدة الأمريكية
يا ترى إيه السبب؟

العلماء وضعوا نظرية .. ممكن تصيبنا بالرعب
وهى إن الفايروس بدأ الانتشار فى المكسيك من فترة طويلة وعلى نطاق واسع
واحتمال إن تبقى فى المكسيك عدد كبير جداً من الإصابات
إذا حسبنا عدد اللى ماتوا بالنسبة له
هنلاقيها نسبة صغيرة جداً
وده للأسف مؤشر مخيف لاحتمال ظهور وفيات بصورة أشد فى الولايات المتحدة وباقى الدول اللى ظهرت فيها الإصابة
وفى حاجة مهمة جداً لازم نتكلم فيها قبل ما نختم المقال
وهى إن ذبح 350 ألف خنزير فى مصر
هينتج عنه ملايين الكيلوجرامات من لحم الخنزير
وممكن تتباع عن طريق بعض التجار معدومى الضمير على إنها لحم بقرى أو جاموسى أو حتى لحم الجمال

إزاى نفرق بين لحم الخنازير واللحوم التانية؟؟؟

عندنا 6 فروق

1- من خلال الختم اللى ممكن نلاحظه على اللحوم ، فالخنزير يختم باللون الأزرق وبشكل دائري يمكن تمييزه عن أختام اللحوم الأخرى.
2- لحم الخنزير يتميز بتغلغل الدهون وسط العضلات والألياف على عكس اللحوم الأخرى اللى يمكن ملاحظة ان الدهون بها عبارة عن كتل .
3- من خلال الرائحة ، لحم الخنزير يتميز برائحة مميزة يمكن ملاحظتها.
4- لحوم الخنازير تتجه إلى اللون الفاتح عند البدء في طهيها على عكس اللحوم الأخرى.
5- أما عن كبده الخنزير فتتميز أن أنسجتها تأخذ شكلا سداسياً منتظماً كخلية النحل .
وعن الطحال فى الخنزير فيتميز انه يأخذ شكل طولي أما اللحوم الأخرى فهو على شكل مثلث.

فيديو من قناة الجزيرة بيوضح تأثير انفلونزا الخنازير على الاقتصاد العالمى


المصادر:
إنفلونزا الخنازير - ويكيبيديا، الموسوعة الحرة
موقع قناة الجزيرة على الانترنت
موقع مصراوى
Swine influenza - Wikipedia, the free encyclopedia
WHO Swine influenza Web Site
BBC News Web Site
1918 - Flu Pandemic killed 2.64 mln in Europe: study
CDC - Centers for disease control & prevention